Spánverjar elska Arnald

Skuggasund eftir Arnald Indriðason er komin út á Spáni og fyrir helgi birtist fyrsti dómurinn í stórblaðinu El Mundo. Og ekkert vantar uppá ánægju ritdómarans Paco Camarassa sem skrifar meðal annars: „Arnaldur Indriðason færir okkur í bókinni tvíþætta rannsókn á glæpum sem eðlishvöt lesandans segir honum að hljóti að vera tengdir. En söguþráðurinn skiptir okkur ekki öllu máli á meðan að Arnaldur beitir sinni vanalegu frásagnasnilld í persónusköpun, á meðan að hann sekkur okkur í óttaþrungið daglegt líf venjulegs fólks sem verður hluti af rannsókninni.“

Og áfram heldur Camarassa: „Sestu í uppáhalds hægindastólinn í hæfilegri þögn, með eða án tónlistar, opnaðu vel þýddar síður Skuggasunds og búðu þig undir að njóta viðstöðulaust, án blóðtauma, raðmorðingja, né róstusamra geðsjúklinga. Bókin framkallar ánægju með hnitmiðuðum texta, íhugulum lýsingum, samkennd lesandans með höfundi sem þrátt fyrir að skrifa um sitt nánasta umhverfi vekur áhuga á öllum landsvæðum.“

Spánverjar virðast þannig hafa sérstakt dálæti á Arnaldi en hann hlaut í síðasta mánuði RBA-bókmenntaverðlaunin spænsku, einmitt fyrir Skuggasund.