Harmsaga á hvíta tjaldið

Framleiðslufyrirtækið ZikZak hefur tryggt sér kvikmyndaréttinn á leikritinu Harmsögu eftir Mikael Torfason sem frumsýnt var í Þjóðleikhúsinu á föstudag.

Leikstjóri kvikmyndarinnar verður Þór Ómar Jónsson en fyrr á árinu frumsýndi hann sína fyrstu bíómynd, Falskan Fugl, sem byggði einmitt á skáldsögu eftir Mikael Torfason.

Í tilkynningu er haft eftir Þór Ómari að handritið af kvikmyndinni sé nánast tilbúið. Hann segist eiga von á því að þau Elma Stefanía Ágústsdóttir og Snorri Engilsbertsson verði boðið að leika aðalhlutverkin, en þau leika í uppsetningu verksins í Þjóðleikhúsinu.

„En auðvitað er það sagt með þeim fyrirvara að ekki er búið að ráða í nein hlutverk eða ræða við leikara. Kvikmyndahandritsskrifin hafa verið styrkt af Kvikmyndamiðstöð Íslands og nú er handritið að komast á það stig að hægt er að fara að vinna í fjármögnun,“ segir Þór Ómar í tilkynningunni.

Það eru þau Þórir Snær Sigurjónsson og Nanna Kristín Magnúsdóttir sem framleiða kvikmyndaútgáfu Harmsögu fyrir hönd ZikZak.