„Mín upplifun var sú að hún væri þarna fyrst og fremst sem kona“

Þráinn Bertelsson, fyrrverandi þingmaður Borgarahreyfingarinnar og VG, gagnrýnir sjónvarpsþáttinn Útúrdúr sem hóf göngu sína í Sjónvarpinu sunnudaginn 15. september.

„Flottur þáttur. Víkingur píanóleikari kom með skemmtilegar og fróðlegar pælingar af djúpri þekkingu og stúlkan var með flott gleraugu,“ ritar Þráinn á Facebook-síðu Viðars Víkingssonar, upptökustjóra þáttanna. Vísar Þráinn þar til Höllu Oddnýjar Magnúsdóttur mannfræðings sem stjórnar þættinum ásamt Víkingi Heiðari Ólafssyni píanóleikara.

Víkingur blandar sér í umræðuna og segir skrýtinn tón í athugasemd Þráins. Ekki sé fyrir hvern sem er að taka viðtöl við fræðimenn og tengja tónlist við fornleifafræði og þróunarlíffræði. Auk þess komi Halla heilmikið að samsetningu efnis og eftirvinnslu.

„Mér fannst allt í fína lagi með hennar framlag til þáttarins,“ svarar Þráinn og segir að sér þyki viðtölin við fræðingana bæta litlu við þáttinn. „Mín upplifun var sú að hún væri þarna fyrst og fremst sem kona. Af hverju er það svo að ekki virðist mega anda á sumt fólk? Og alls ekki ef um kvenfólk er að ræða?“

Viðar upptökustjóri svarar Þráni á latínu og skrifar: „Nemo me impune lacessit,“ sem útleggst á íslensku sem „enginn særir mig refsilaust,“ og er kjörorð Skotlands.

Tilvitnunin leggst illa í Þráin sem yfirgefur umræðuna í kjölfarið. „Það er alveg óþarfi að hafa í hótunum við mig - þótt það sé stæll á því að gera það á latínu. Takk fyrir spjallið. Skal ekki plaga þig meira hérna á fb.“