Þriðja bókin um Bridget Jones væntanleg: Lykilpersóna skrifuð út

Þriðja bókin í ævintýrinu um hina seinheppnu Bridget Jones er væntanleg hinn 10. október. Bókin ber titilinn Mad About The Boy en höfundur bókanna, Helen Fielding, ákvað að skrifa Mark Darcy, eiginmann Bridget, úr sögunni. Sýnishorn úr bókinni var birt í Sunday Times í dag en þar kemur fram að Mark sé látinn og að Bridget sé 51 árs gömul ekkja, heltekin af hrukkunum sínum.

Fyrri bækurnar um Bridget Jones, Dagbók Bridget Jones og Bridget Jones á barmi taugaáfalls, slógu rækilega í gegn og seldust meira en 15 milljónir eintaka um heim allan. Eftir bókunum voru gerðar kvikmyndir með þeim Renee Zellweger, Hugh Grant og Colin Firth í aðalhlutverkum.