Anna Mjöll: Ég mun alltaf sakna hans

Söngkonan Anna Mjöll Ólafsdóttir gaf okkur leyfi til að birta meðfylgjandi myndir af henni og fyrrverandi eiginmanni sínum, Cal Worthington, sem lést 92 ára að aldri síðustu helgi. Cal var þekktur bílasali í Bandaríkjunum en hann varð þekktur á Íslandi þegar hann gekk að eiga Önnu Mjöll í apríl árið 2011. Hjónabandið var ekki langlíft og í lok sama árs sótti Anna Mjöll um skilnað frá honum. Um fimmtíu ára aldursmunur var með hjónunum.

Ég er búin að gráta mikið

„Þetta er alveg hryllilega sorglegt allt saman. Ég er búin að gráta mikið. Hann var einn af þessum sterku persónuleikum sem lita heiminn. Ég mun alltaf sakna hans," segir Anna Mjöll.

Þetta brúðkaup var bara tóm della

„Þetta er ein af mínum uppáhalds myndum af því að svona vorum við oftast á „ranchinum" öll árin síðan við hittumst 2004.  Þetta brúðkaup var bara tóm della. Við hefðum aldrei átt að giftast. Okkur þótti svo vænt um hvort annað og það var alveg nóg," segir Anna Mjöll þegar hún sýnir okkur myndina sem sjá má af henni og Cal hér að ofan.

Frábærir vinir

„Hér kemur ein úr afmælisveislu sem ég hélt heima fyrir son hans. Hann sagði að ég væri miklu líkari sér hvað varðar persónuleika en öll börnin hans samtals."

Bensín í stórum tönkum á búgarðinum

„Hér er hann að taka bensín heima ásamt barnabarni sínu. Við vorum bara með bensínið í stórum tönkum á „ranchinum". Það var ódýrara af því að það var keypt í svo miklu magni og auðveldara af því að þá gátum við látið sjálf bensín á bílana og flugvélarnar," útskýrir Anna Mjöll.

Post by Vísir.is.