Prins og fótboltastjarna koma náttúrunni til bjargar

Vilhjálmur Bretaprins lætur til sín taka í góðgerðarmálum eftir að hann hætti í hernum. Nú leiðir hann herferð til bjargar villtri náttúru með dyggri aðstoð fótboltastjörnunnar David Beckham.

Vilhjálmur og Beckham hafa meðal annars gert myndbönd til verndar nashyrningshornum og fílabeini sem eru vinsælar vörur á svarta markaðnum.

Ný samtök, Sameinumst fyrir villta náttúru, standa fyrir herferð gegn eyðingu náttúruauðlinda og er Vilhjálmur forseti samtakanna.

Vilhjálmur sagði nýlega í yfirlýsingu að náttúruarfleifðir okkar væru í hættu. Hann beindi orðum sínum sérstaklega til neytenda.

„Markaðurinn stjórnar ólöglegum viðskiptum með villt dýr. Ef markaðurinn vill fá vörur, sem valda dauða tíu þúsunda dýra á hverju ári og setur þessar tegundir í útrýmingarhættu, þá fær hann þær. Leyfum börnunum okkar að njóta villtrar náttúru í sínum fjölmörgu fallegu myndum," sagði Vilhjálmur í tilkynningu.