Ásdís Rán lærir á þyrlu

 „Ég er kannski ekki þessi týpíski þyrluflugmaður en núna þegar ég er að enda fyrirsætuferilinn þá næ ég vonandi að eltast við næsta draum sem er að læra þyrluflugmanninn," segir fyrirsætan Ásdís Rán Gunnarsdóttir, sem ferðaðist til London á dögunum til þess að læra á þyrlu.

Fyrsti þyrlutími Ásdísar var á fimmtudaginn og segir hún allt hafa gengið vel. „Þetta var alveg frábært og ég fékk fína einkunn. Þyrludellan mín minnkaði allavega ekki eftir þetta flug." Hún segir námið kostnaðarsamt en að hún sé vön að setja sér stórtæk markmið. Henni ætti því að takast að ljúka við námið.  

Ásdís, sem búið hefur í Búlgaríu um nokkurt skeið, þarf að ferðast til London í þyrlutímana en slíkt nám er ekki að finna í heimalandinu. „Það er hvorki kennt á þyrlu á Íslandi né í Búlgaríu svo það er ekki auðvelt fyrir mig að læra þetta. Í London flýg ég með vini mínum sem er einn besti þyrluflugmaðurinn í Evrópu svo ég reikna með því að vera á flakki þangað í vetur. Ég hef samt líka verið að skoða nám í Búkarest en þetta mun allt koma í ljós á næstu mánuðum."