Stífar æfingar fyrir rass, kvið og læri

Booty Ballet er nýjung í líkamsrækt á Íslandi þar sem vöðvarnir eru tónaðir með áhrifaríkum skemmtilegum æfingum að sögn Hönnu Ottósdóttur, 29 ára, sem hefur umsjá með tímunum í World Class laugum.

Tónar líkamann

„Í Booty Ballet er áherslan á að tóna líkamann í sitt fegursta form. Styrktaræfingar sem upprunnar eru úr heimi balletsins, móta og tóna vöðva líkamans á áhrifaríkan hátt," segir Hanna.

Hvað erum við að tala um - hvernig æfingar eru þetta? „Æfingarnar eru rólegar en krefjandi, í takt við þægilega tónlist í volgum sal. Lögð er áhersla á sérstakar samsettar styrktar- og teygjuæfingar sem móta fallega vöðva og grenna allan líkamann," útskýrir hún. 

„Unnið er með eigin líkamsþyngd og vöðvarnir þjálfaðir að þreytumarki eftir ákveðnu kerfi ofhleðslu og teygjuæfinga. Stífar æfingar fyrir rass, kvið og læri skila þeim grönnum, stinnum og stæltum," segir hún að lokum.