Evrópska kvikmyndahátíðin hefst í kvöld

Evrópska kvikmyndahátíðin (EFFI) veður opnuð í kvöld. Öllum landsmönnum er boðið á opnunina í Bíó Paradís. Kvöldið hefst klukkan 19:30 og verður gestum boðið upp á fordrykk. Hálftíma síðar verða ókeypis sýningar í öllum sölum bíósins.

Eftir sýningarnar verður boðið upp á mat og drykk og hljómsveitin Illgresi mun spila lög úr opnunarmynd hátíðarinnar, The Broeken Circle Breakdown.

Í tilkynningunni frá aðstandendum hátíðarinnar segir að þau vonist til þess að sjá sem flesta á opnunarhátíðinni og þau hlakki til þess að færa Íslendingum það besta sem evrópsk kvikmyndagerð hefur upp á að bjóða.

Kvikmyndahátíðinni lýkur 29. september og fer hátíðin fram í Bíó Paradís.

Hrönn Sveinsdóttir, framkvæmdarstjóri Bíó Paradísar sem sér um hátíðina í samstarfi við Evrópustofu segir evrópska kvikmyndagerðarmenn vera fremsta meðal jafningja þegar kemur að frábærum og áhugaverðum kvikmyndum. Hátíðinni er ætlað að gefa þverskurð af því besta sem álfan hefur upp á að bjóða.

Heiðursgestur hátíðarinnar í ár er pólska kvikmynda- og sjónvarpsleikstýran Agnieszka Holland.  Að sögn Hrannar er hún ein af fáum starfandi kvenleikstjórum í Hollywood sem hefur getið sér gott orð í listrænni og pólitískri kvikmyndagerð.