Tim Howard hissa á sjálfstrausti Arons

Aron Jóhannsson er í landsliðshópi Bandaríkjanna sem mætir Kostaríka í undankeppni HM 2014 aðfaranótt laugardags.

Aron er mættur til San José í Kostaríka ásamt félögum sínum í bandaríska landsliðinu. Stuðningsmenn heimamanna tóku „vel“ á móti Bandaríkjamönnum á flugvellinum. Var eggjum meðal annars kastað í rúður flugvallarins.

„Þessar móttökur voru af annarri stærðargráðu en ég hafði reiknað með,“ sagði Aron í samtali við bandaríska fjölmiðla fyrir æfingu liðsins í gær. Viðtalið er birt á heimasíðu MLS-deildarinnar. Landslið Bandaríkjanna er vant kuldalegum viðtökum í Mið- og Suður-Ameríku en þetta er fyrsta reynsla Arons af landsleikjum gegn grannþjóðunum.

„Stuðningsmennirnir eru greinilega spenntir fyrir leiknum en það erum við líka.“

Aron spilaði sinn fyrsta landsleik gegn Bosníu í Sarajevó á dögunum. Um æfingaleik var að ræða þar sem Aron kom inn á sem varamaður í síðari hálfleik. Hann þótti standa sig vel og segist afar sáttur með andrúmsloftið í herbúðum landsliðsins.

„Það kemur mér ekki á óvart enda var Jozy (Altidore) búinn að segja mér hversu miklir toppmenn væru í liðinu,“ sagði Aron. Móttökurnar hafi verið frábærar og hann sé þegar orðinn einn af hópnum.

Tim Howard, markvörður Everton í ensku úrvalsdeildinni og landsliðinu, hrósaði Aroni fyrir frammistöðu sína í leiknum gegn Bosníu og Hersegóvínu.

„Hann er með ótrúlega mikið sjálfstraust. Ég veit ekki hvaðan það kemur. Ég hafði ekki svona mikið sjálfstraust þegar ég var strákur,“ sagði Howard.