„Við erum algjörlega í skýjunum“

„Við unnum fullnaðarsigur. Þetta er sögulegt mál enda fyrsta skipti sem stúdentaráð fer í mál og við unnum. Þetta sýnir að hagsmunabaráttan er ekki til einskis,“ segir María Rut Kristinsdóttir, formaður Stúdentaráðs.

Rétt í þessu féll dómur í héraðsdómi Reykjavíkur í máli Stúdentaráðs gegn LÍN og íslenska ríkinu, en málið var höfðað vegna breytinga sem gerðar voru á útlánareglum sjóðsins. 



Fallist var á kröfu Stúdentaráðs að fella niður breytingu á grein 2.2. í úthlutunarreglum Lánasjóðs íslenskra námsmanna. Breytingin fólst í að lágmarksnámsframvinda var hækkuð í 22 einingar úr 18 einingum.

„Þetta þýðir að lágmarksframvindan verður áfram 18. Við erum algjörlega í skýjunum. Við erum búin að vera í allt sumar að vinna að þessu markmiði, fengum lítinn fyrirvara til að bregðast við og höfum nýtt alla okkar klukkutíma að vinna í þágu stúdenta og tryggja að þessi breyting verði ekki að veruleika,“ segir María Rut.

María segir að breytingin hefði verið verulega íþyngjandi fyrir hátt í tvö þúsund námsmenn.

„Mjög margir einstaklingar voru uggandi yfir sinni framtíð og við vorum búin að fá ótal sögur frá fólki sem þurfti ef til vill að hætta við að fara í skóla út af þessum breytingum,“ segir María Rut.  

Rétt eftir að dómur var kveðinn sagði lögmaður Lánasjóðs íslenskra námsmanna að sjóðurinn myndi að öllum líkindum áfrýja niðurstöðunni til Hæstaréttar. María Rut segir að nú verði bara að bíða og sjá. „Þetta er ekki í okkar höndum. Í dag fögnum við. Mér líður allavega stórvel, var með hita áðan en ég held hann sé bara farinn,“," segir María Rut.