Kanye West lögsóttur

Rapparinn Kanye West réðst á ljósmyndara sem reyndi að smella af honum mynd á flugvellinum í Los Angeles í sumar.

Ljósmyndarinn sem heitir Daniel Ramos heldur því fram að hann hafi séð West fyrir tilviljun og á að hafa spurt West hvort hann mætti ræða við hann. West á að hafa snúið sér að ljósmyndaranum, spjallað við hann í örstutta stund en síðan reynt að hrifsa af honum myndavélina. Í kjölfarið hófust slagsmál.

Ramos reyndi hvað hann gat til þess að halda í myndavélina en féll á jörðina og meiddist lítillega.

Lögmaður hans heldur því fram að Ramos hafi í átökunum orðið fyrir áfalli sem hann glími enn við.

Beðið er eftir úrskurði dómara í málinu en West vill ekki tjá sig um málið að svo stöddu.