Skyndilausnir virka sjaldnast

Guðmundur Hafþórsson íþróttafræðingur og einkaþjálfari undirbýr námskeið sem ber yfirskriftina Lífstílssprengja en það er námskeið fyrir fólk sem hefur áhuga á því að skipta yfir í hollari og heilbrigðari lífsstíl.

„Þetta er fjölbreytt og skemmtilegt námskeið þar sem fólk öðlast skilning á því hvað öll þessi aukahreyfing skiptir máli ásamt því hvað það er auðvelt að hreyfa sig," segir Guðmundur.

Fjallgöngur og fleira

„Rösk ganga, létt skokk, stuttir sprettir, líkamsæfingar. Eins munum við þegar líður á námskeiðið fara í fjallgöngu. Markmiðið er að fara á Esjuna einusinni eða tvisvar. Á föstudögum munum við svo vera í speglasal í Ásgarði þar sem við munum vinna með líkamsæfingar, armbeygjur, hnébeygjur kviðæfingar og þessháttar. Fólk fær að kynnast hinum ýmsu æfingum sem það getur hreinlega gert heima hjá sér," segir Guðmundur og bætir við: „Við munum vera þrisvar í viku á æfingum, mánudaga, miðvikudaga og föstudaga Unnið verði í tækjasal, verðum úti, spegla sal og einstaka sinnum skellum við okkur í laugina í Ásgarði."

Þátttakendur frá skrefamæli

„Allir sem skrá sig á námskeiðið fá í hendurnar skrefamæli. Hér kemur aðal kúnstin. Fólkið fær verkefni fyrir hverja viku. Þegar við byrjum fá þau ákveðið magn af skrefum sem ég ætlast til að þau gangi á degi hverjum frá því að þau vakna þar til að þau fara að sofa. Þetta á að skrá niður gaumgæfilega og förum við reglulega yfir það. Nú þarf fólk virkilega að fara að spá í því að taka stigana frekar en lyftur, leggja bílnum aðeins lengra frá vinnunni en áður, fara úr strætó jafnvel einni stoppistöð fyrr," útskýrir Guðmundur.

Fylgist vel með mataræðinu

„Það er ýmislegt sem það getur gert til þess að auka hreyfingu dagsins. Ég mun fylgjast vel með mataræðinu, rétt eins og með skrefin þá tökum við þetta eitt skref í einu, breytum hlutunum í rólegheitum en ekki í einhverju offorsi."

Skorar á fólk að mæta

„Skyndilausnir virka sjaldnast og því er erfitt að byrja að hreyfa sig, umturna mataræðinu og breyta öllum lífstílnum á einni viku, fólk gefst auðveldlega upp þannig. Ég ætla að bjóða upp á opinn fund í Ásgarði Sunnudaginn 25.ágúst klukkan 12. Þar mun ég fara yfir námskeiðið, hvað það er sem við munum gera, hvað ég legg upp með og hvað fólk getur séð fyrir sér gerast. Ég skora á alla til að mæta sem hafa áhuga og vilja til að sprengja upp gamla lífstílinn og byrja á nýjum, hollum og heilbrigðum lífsstíl," segir Guðmundur.

Við fengum nokkur einföld og góð heilsuráð hjá Guðmundi:

Drekktu vatn fyrir hverja máltíð

Drekktu eitt vatnsglas fyrir hverja máltíð. Með því að drekka þá fyllir þú magann af vökva og því meiri líkur á því að þú borðir bara nægju þína. 

Fáðu þér ávöxt fyrir máltíð

Bættu hollustuvöru við hverja máltíð. Ef þú færð þér alltaf tvisvar á diskinn á hverju kvöldi prófaðu þá að fá þér einn ávöxt fyrir máltíðina. Þannig verður örlítið minna pláss fyrir „óhollari” matinn og þar að auki er ávöxtur hollara val.

Litlar máltíðir

Borðaðu litlar máltíðir í gegnum daginn. Það gerist allt of oft að við gleymum að borða og borðum við því allt of mikið þegar við erum orðin of svöng. Ofát veldur miklu meiri söfnun af fitu en að halda líkamanum stöðugt á tánum við að brenna því sem kemur inn.

Hreyfðu þig 

Hreyfðu þig meira í gegnum daginn en þú ert vön/vanur. Allar litlu hreyfingarnar skipta máli. Það eitt að standa meira í gegnum daginn getur skipt höfuð máli.



http://www.meistarathjalfun.com - heimasíða Guðmundar - upplýsingar um námskeiðið.