Einleikshátíðin Act Alone í fullum gangi

Einleikshátíðin Act Alone er nú í fullum gangi á Suðureyri við Súgandafjörð.

Hátíðin er nú haldin í tíunda sinn.

Fjöldi listamanna leggur leið sína vestur á firði til þess að vera viðstatt og taka þátt í hátíðinni.

Þar má nefna Sögu Garðarsdóttur, leikkonu sem verður með einleikinn Heilinn, hjarta sálarinnar, Víking Kristjánsson, leikara, sem sýnir verkið Tribbjút, Björn Hlyn Haraldsson, leikara og leikstjóra, Rakel Garðarsdóttur, framkvæmdastjóra Vesturports, Ilm Kristjánsdóttur, leikkonu, Jón Viðar, leikhúsgagnrýnanda, Ágúst Bent, tónlistarmann og leikstjóra, og svo mætti lengi telja.

Dagskrá hátíðarinnar er þéttskipuð, og á hátíðinni geta allir fundið eitthvað við sitt hæfi.

Í gær flutti Bjarni Haukur Þórsson verk sitt How to become Icelandic in 60 minutes, sem notið hefur mikilli vinsælda í Hörpu undanfarið.

Verkið fer fram á ensku og í því gerir Bjarni Haukur óspart grín að Íslendingum og öðrum.

Viðbrögðin við sýningunni létu ekki á sér standa, en áhorfendur kútveltust um af hlátri.

Bjarni Haukur var sannfærandi og skemmtilegur í hlutverki sínu.

Þá hélt Helga Arnalds, leikkona, sýningu sem heitir Skrímslið litla systir mín í félagsheimilinu á Suðureyri í dag.

Sýningin var þéttsetin, af börnum jafnt sem fullorðnum.

Þar bauð hún börnunum á sýningu sem var unnin á afar óhefðbundin hátt en leikmyndin er öll úr pappír.

Sagan og persónur lifna síðan við úr leikmyndinni.

Pappírinn rifnar og umbreytist í börn og dreka, skrímsli og aðrar furðuverur.

Þá hélt tónlistarmaðurinn sívinsæli Mugison tónleika í gær í Þurrkverinu, þar sem margt var um manninn.

Eiginkona Mugisons, steig einnig á svið, söng með eiginmanni sínum og var síðar með gjörning á sviðinu.

Þá var María Pálsdóttr með sýninguna Hermann Hleypur sem vakti kátínu viðstaddra.

Þar talar Hermann sig í gegnum áföll æskunnar og reynir að takast á við frammistöðuótta og kynlífskvíða.

Í kvöld kemur Bjartmar Guðlaugsson til með að halda uppi stuðinu í félagsheimilinu á Suðureyri, en mikil eftirvænting ríkir meðal hátíðargesta.