Jón lifði sig 100% inn í karakterinn

Rithöfundurinn Tobba Marínós hitti Jón Gnarr í gleðigöngunni síðustu helgi. Við spurðum Tobbu hvernig borgarstjórinn tæklaði hlutverkið klæddur í þjóðbúning með lakkaðar neglur og líka væntanlega bók eftir hana sem kemur út næsta vor.

Jón var æðislegur

„Jón var æðislegur og lék á alls oddi. Kallaði okkur elskurnar sínar og spilaði Brennið þið vitar og aðra þjóðlega tónlist. Hann veifaði eins og sönn dama og henti rauðum rósum til fólksins. Sonur hans, Nonni litli, var með ullarsjal og húfu og sat aftan á bílnum. Snillingur drengurinn eins og pabbi sinn," segir Tobba.

„Jón lifði sig 100% inn í karakterinn sem var hinn íslenski skörungur sem býr innra með okkur. Röddin, fasið og lundarfarið var kvenlegt en sterkt eins og þjóðarsálin sjálf," segir Tobba spurð hvort Jón hafi að hennar mati tekið hlutverkið alla leið.



Brennið þið vitar - var m.a. spilað á vagni borgarstjórans í gleðigöngunni síðustu helgi:

Bók væntanleg eftir Tobbu

Mun þessi reynsla þín með borgarstjóra rata í væntanlega bók eftir þig? „Þessi reynsla mun ekki rata í bókina mína þar sem hún fjallar mest um æsku mína og unglingsár og fram undir tvítugt líklega - en þetta rímar þó allt saman því ég var í sveit átta sumur af ævi minni. Mjólkaði, bakaði, mokaði skít og reið út - eins og íslenskir skörungar gera jafnan," segir Tobba.

Hvernig ganga annars skrifin? „Skrif ganga vel en ég fer í einangrun út á land núna næstu helgar að skrifa en bókin kemur út í vor."

Kalli í flippferð

Hvað með Kalla unnusta þinn? „Til allrar hamingju er Kalli að fara til Nashville að taka upp með Baggalút og í flippferð með vinum sínum þannig að ég læt ekki freistast til að kúra fyrir framan sjónvarpið með honum."