Fæðingin var martröð

Glamúrfyrirsætan Katie Price eignaðist soninn Jett Riviera í síðustu viku. Jett kom í heiminn átta vikum fyrir tímann og þurfti Katie að fara í bráðakeisaraskurð.

Katie fékk sýkingu sem hefði getað dregið hana til dauða og jafnvel ófætt barn hennar og því var eina lausnin að taka barnið með keisaraskurði. Katie segir í samtali við Mirror að þessi lífsreynsla hafi verið mjög ógnvekjandi.

“Þetta var martröð. Hjartsláttur barnsins var mjög veikur,” segir Katie en eiginmaður hennar, Kieran Hayler, var að versla þegar Katie var drifin inn á skurðstofuna. Hann var ekki lengi að komast á sjúkrahúsið en mátti ekki fylgjast með keisaraskurðinum.

Katie hefur átt tvö önnur börn sín með keisaraskurði en Jett er hennar fjórða barn. Hún á soninn Harvey, ellefu ára, með knattspyrnumanninum Dwight Yorke og soninn Junior, átta ára, og dótturina Princess, sex ára, með fyrrverandi eiginmanni sínum Peter Andre. Katie var útskrifuð af sjúkrahúsi á föstudag en Jett litli gæti þurft að verja allt að þremur vikum þar til viðbótar.

Dragðu Tarotspil dagsins hér.