Fornfálegur vopnabúnaður Kúbu

Tollverðir í Panama fundu vopn og vopnabúnað í skipi frá Norður-Kóreu, sem var að sigla um Panamaskurð.

Fundurinn vakti verulega athygli en í gærkvöldi tilkynntu svo yfirvöld í Kúbu að þau ættu vopnin. Yfirlýsingin var lesin upp í sjónvarpi og þar kom fram að um væri að ræða gömul flugskeyti og búnað þeim tengdur. Til hefði staðið að fá gert við vopnin og búnaðinn í Norður-Kóreu og meiningin að fá þá vopnin til baka, sömu leið.

Búnaðurinn er gamall, eða frá því fyrir 1960 og er upphaflega frá Sovétríkjunum. Í yfirlýsingunni kemur fram að þessi vopn væru bráðnauðsynleg fyrir Kúbu til að landið gæti varið fullveldi sitt. Vopnin fundust við hefðbundna fíkniefnaleit en þeim hafði verið komið fyrir undir sykurfarmi.