Kríuvarpið í Vík í Mýrdal hefur löngum verið talið það stærsta á Íslandi. Í ár eru mun færri kríur þar en áður hefur sést. Allt útlit er fyrir að sandsíldarstofninn sé nánast hruninn. „Kríunni hefur fækkað fjórfalt eða fimmfalt frá því þegar mest var,“ segir Þórir N. Kjartasson, íbúi í Vík og fuglaáhugamaður.
Hörmulegt ástand
Þórir segir ástandið á fuglunum hafa verið hörmulegt síðustu ár. „Útlitið er ekki gott. Það eru svona 15 - 20 ár síðan maður fór að taka eftir fækkuninni og það er greinilegt að fuglarnir eiga í miklum vandræðum með að koma upp ungum.“ Hann telur fullvíst að fuglana vanti æti, en aðalfæða kríu og lunda er sandsíli.
Tilhugalíf kríunnar ætti að standa sem hæst um þessar mundir og þá ætti hún að sjást fljúgandi fram og til baka með sandsíli í gogginum. Þórir segist ekki hafa orðið var við þetta í ár. „Krían er orpin dálítið en það er ekki góðs viti að maður sér hana ekkert flúgandi með síli.“
Lundabyggðin nánast tóm
Lundinn á líka undir högg að sækja, en hann hefur verið gífurlega vinsæll meðal ferðamanna síðustu ár. Nú er sífellt erfiðara að hafa uppi á honum, en hann situr lítið uppi í lundabyggðinni. „Það er ömurlegt að horfa upp á þetta, lundabyggðin er nánast tóm. Þeir eru bara úti á sjó að reyna að fiska sér eitthvað í matinn yfir daginn og eru mun færri en síðustu ár.“
Sandsílið horfið
Fyrir nokkru var skipuð nefnd sem rannsakaði hver væri orsök afleitrar afkomu lunda og annarra sjófugla. Þórir segir að niðurstaðan hafi legið beint við, sandsílið var nánast horfið. Hann segir brýna þörf á að rannsaka sandsílafækkunina, en skýringar sem nefndar hafa verið eru hlýnun sjávar, ofveiði á loðnu og vanveiði á bolfiski. „Ég legg til að nýr umhverfisráðherra skipi nefnd til að rannsaka málið. Það þarf að vita hvort það er eitthvað í mannlegu valdi sem getur breytt þessu áður en fuglarnir hreinlega hverfa alveg," segir Þórir að lokum.
