Mayweather ætlar að berjast við Alvarez

Hnefaleikakappinn Floyd Mayweather Jr. hefur tekið ákvörðun um sinn næsta bardaga en hann ætlar að berjast við Canelo Alvarez þann 14. september næstkomandi.

Bardaginn mun að sjálfsögðu fara fram í Las Vegas. Alvarez er hörkubardagamaður þrátt fyrir að vera aðeins 22 ára. Hann hefur unnið 42 af þeim 43 bardögum sem hann hefur tekið þátt í.

Mayweather hefur aftur á móti aldrei tapað og fyrr í mánuðinum fór hann illa með Robert Guerrero. Sá bardagi skilaði honum litlum 32 milljónum dollara.

"Ég ætla að gefa aðdáendunum það sem þeir vilja og slást við Alvarez. Bardaginn fer fram á MGM-hótelinu," sagði Mayweather á Twitter.