Ráðuneytum verður fjölgað - stjórnarsáttmáli kynntur í kvöld

Bæði ráðuneytum og ráðherrum verður fjölgað með nýrri ríkisstjórn. Stjórnarsáttmáli Framsóknar- og Sjálfstæðisflokks tekur meðal annars á skuldamálum heimilanna. Hann verður kynntur flokksmönnum í kvöld og hittir formaður Framsóknarflokksins svo forsetann á morgun.

Þeir Sigmundur Davíð Gunnlaugsson formaður Framsóknarflokksins og Bjarni Benediktsson formaður Sjálfstæðisflokksins hittu í dag nýja þingmenn flokka sinna til að fara með þeim yfir stöðuna.

Þeir funduðu sérstaklega með hverjum og einum þingmanni. Á morgun ætla þeir svo að funda með reyndari þingmönnum og má búast við að ráðherraembættin verði þá til umræðu. Annað kvöld verða svo þingflokksfundir þar sem farið verður yfir skipan ráðherranna. Samkvæmt heimildum fréttastofu verður bæði ráðuneytunum fjölgað svo og ráðherrum með nýrri ríkisstjórn. Þannig verða ráðuneytin að öllum líkindum 9 en ráðherrarnir 10 og tveir ráðherrar skipta þá með sér verkum í einu stóru ráðuneytanna. Þá verða verkefni færð á milli ráðuneyta og verkefnum atvinnuvegaráðuneytisins líklega skipt upp á milli flokkanna tveggja.

Sigmundur Davíð verður forsætisráðherra en Bjarni fjármálaráðherra í nýrri ríkisstjórn. Þá fellur utanríkisráðuneytið í skaut Framsóknarflokksins.

Sigmundur Davíð kynnir stjórnarsáttmálann fyrir miðstjórn sinn í Rúgbrauðsgerðinni klukkan hálf níu í kvöld og þarf miðstjórnin að samþykkja hann. Á sama tíma fundar flokksráð Sjálfstæðisflokksins um ríkisstjórnarsamstarfið og verður það borið upp til samþykktar. Stjórnarsáttmálinn verður svo kynntur fjölmiðlum fyrir hádegi á morgun. Samkvæmt heimildum fréttastofu verður hann frekar almennt orðaður en á meðal þess sem kemur þar fyrir eru aðgerðir vegna skuldamála heimilanna og jafnvel breytingar á veiðileyfagjaldinu.

Sigmundur Davíð hittir Ólaf Ragnar Grímsson, forseta Íslands, á Bessastöðum klukkan níu í fyrramáli. Þar tilkynnir hann líklega Ólafi að honum hafi tekist að mynda nýja ríkisstjórn Framsóknarflokks og Sjálfstæðisflokks þremur vikum eftir að hann fékk stjórnarmyndunarumboðið. Að öllum líkindum verða svo ríkisráðsfundir á fimmtudaginn þar sem ný ríkisstjórn tekur við.