Óskýr mörk tísku og listar

Listamennirnir Andrea Maack og Huginn Þór Arason opna sýninguna Kaflaskipti í Hafnarhúsinu á morgun. Undirbúningur verkefnisins hefur tekið rúmlega tvö ár. Verkið byggir á reynslu Andreu sem ilmvatnsframleiðanda en einnig á áhuga Hugins Þórs á að umbylta hlutverki sýningarsalsins.

Andrea segir verkið byggja á óskýrum mörkum tísku og listar, en tískan er persónulegt áhugamál þeirra beggja. „Í sýningarsalnum verður hálfgerður tískusýningarpallur og svokallaðir „goodie bags“ eins og oft eru í boði á tískusýningum. Fólk fær þó ekki að taka þá með sér í þetta skiptið heldur eru þeir hluti af innsetningunni.

Hugmyndin kviknaði á Marc Jacobs tískusýningu

„Við fengum hugmyndina þegar Marc Jacobs notaði sólina hans Ólafs Elíassonar á tískusýningu fyrir einhverjum árum og tvinnaði listaverkinu þannig saman við tískupallana. Við tókum hugmyndina og snérum henni við, settum tískuna inn í sýningarsalinn.“ Andrea er viss um að mörk tísku og listar verði enn óskýrari í komandi framtíð. „Verkið er okkar framtíðarsýn. Það er algjörlega í takt við það sem er að gerast í tískuheiminum erlendis. Framtíð listarinnar liggur á sýningarpöllum og verslunarútstillingum. Ólafur Elíasson hefur til dæmis hannað útstillingu í glugga fyrir Louis Vuitton.“

50 sérhannaðir ilmir frá Frakklandi

Sýningarsalurinn í Hafnarhúsinu mun anga af 50 áður óþekktum ilmum sem voru sérstaklega hannaðir fyrir verkið af mismunandi ilmvatnsframleiðendum í Frakklandi. Lyktirnar verða í handgerðum pappírsskúlptúrum og blandast svo saman í loftinu. Sýningargesturinn finnur því mismunandi lyktir eftir því hvar í sýningarsalnum hann er staddur. Andrea er spennt fyrir opnuninni. „Þetta er alveg ótrúlega skemmtilegt verkefni þó að fæðingin hafi vissulega verið löng. Ilmvötnin mín byrjuðu í listinni svo þetta er í raun komið í heilan hring hjá mér.“

Kaflaskipti opnar kl 16 á morgun og eru allir velkomnir.