Rúmlega fjögur þúsund hafa kosið í íbúakosningum í Reykjavík

Nú þegar rúmur sólarhringur er þar til rafrænum íbúakosningum í Reykjavík lýkur hafa rúmlega fjögur þúsund manns kosið samkvæmt upplýsingum frá Reykjavíkurborg. Íbúakosningarnar hafa staðið yfir frá 4. apríl en kosningakerfið verður opið fram yfir miðnætti á morgun, fimmtudaginn 11. apríl.

Allir íbúar í Reykjavík,  sem fæddir eru 1996 eða fyrr, geta kosið um framkvæmdir í hverfinu sínu en hægt er að velja á milli allt að 30 verkefna í hverju hverfi.  Kosningin fer þannig fram að hvert hverfi hefur ákveðna fjárupphæð og geta íbúar nýtt hana alla í því hverfi sem þeir kjósa.

Kosið er á vefslóðinni kjosa.betrireykjavik.is en kjósendur auðkenna sig með aðalveflykli ríkisskattstjóra eða rafrænum skilríkjum.

Hér fyrir neðan má finna atriði sem gott er að hafa í huga að mati forsvarsmanna verkefnisins: 

Hér eru fáein atriði sem gott er að hafa í huga þegar kosið er:

 

·         Einungis er hægt að kjósa um framkvæmdir í einu hverfi, að eigin vali.

·         Verkefni er valið með því að smella á heiti þess. Verkefnið verður dökkblátt og birtist í stikunni fyrir ofan verkefnalistann.

·         Í stikunni er hægt að sjá hversu mikið fjármagn hefur verið notað og hversu mikið er eftir.

·         Hægt er að hætta við að velja verkefni með því að smella á það aftur.

·         Hægt er að velja verkefni þar til öll fjárheimild hverfisins er nýtt eða þar til ekkert þeirra verkefna sem eftir eru rúmast innan hennar (litur þeirra verður ljósblár).

·         Þegar smellt á Greiða atkvæði hnappinn birtist staðfesting á því að atkvæði hafi verið móttekið.

·         Þú getur endurtekið kosninguna eins oft og þú vilt en athugaðu að aðeins síðasta kosningin er tekin gild.

* Aðalveflykill er sá sami og notaður er til skila á skattframtali. Ef aðalveflykill hefur týnst er hægt að fá hann sendan samstundis í heimabanka. Þar birtist hann undir rafræn skjöl eða netyfirlit. Sjá hér.