Segist hafa beðið Guðnýju afsökunar

Sighvatur Karlsson, sóknarprestur á Húsavík, hefur sent frá sér yfirlýsingu vegna máls Guðnýjar Jónu Kristjánsdóttur sem var til umfjöllunar í Kastljósi á mánudag. Segist hann hafa beðið Guðnýju Jónu afsökunar og að hugur sinn hafi aldrei staðið til að fá hana til að draga kæruna til baka.

„Ég átti samtal við sóknarprestinn og spurði hann um aðkomu hans að málinu,“ segir Solveig Lára Guðmundsdóttir, vígslubiskup á Hólum, en hún fundaði með Sighvati síðdegis vegna málsins.

„Ég ætla nú svo sem ekki að fara nánar út í það þar sem um var að ræða trúnaðarsamtal, en ég get sagt að í samtalinu kom fram að hann hefði ekki gerst brotlegur í starfi, en hann gerði mistök.“

Solveig segir Sighvat ekki hafa brotið starfsreglur presta en það hafi verið mistök að ýja að því við stúlkuna að draga kæruna til baka.

„Það eru mistök, hann átti ekki að gera það.“

En er þá ástæða til að endurskoða starfsreglur presta, ef mistök Sighvats falla ekki undir þær?

„Starfsreglur og verkferli kirkjunnar eru öll mjög breytt frá þessum tíma. Það er algjör regla að allir prestar hvetja alla skjólstæðinga sína sem verða fyrir ofbeldi að kæra, og eru ekki að gerast sáttaaðilar á milli þolenda og gerenda í ofbeldismálum. Þessir verkferlar eru algjörlega á tæru í kirkjunni í dag.“

Yfirlýsingu Sighvats má lesa í heild sinni hér.

Í tilefni af viðtali við Guðnýju Jónu Kristjánsdóttur í Kastljósi mánudagskvöldið 8. apríl vil ég taka fram eftirfarandi:

Ég hef haft samband við Guðnýju Jónu og beðið hana afsökunar á því að hafa ekki mætt henni með þeim stuðningi sem hún þurfti í kjölfar nauðgunar. Hugur minn stóð aldrei til þess að fá hana til að draga kæru sína til baka. Mér er nú ljóst mikilvægi þess að tala mjög skýrt í málum sem þessum.

Í kjölfar þessa alvarlega atburðar fór af stað erfið umræða innan samfélagsins á Húsavík. Ég gerði það sem í mínu valdi stóð til að koma í veg fyrir að undirskriftalisti til stuðnings gerandanum yrði birtur í Skránni. Ég reyndi  einnig að lægja öldurnar með yfirlýsingu sem birt var í Skránni. Af henni má ráða mína afstöðu sem var að réttvísin ætti að leiða þetta mál til lykta.

Í mínum huga er nauðgun mjög alvarlegur glæpur, sem ber að taka á sem slíkum. Það er skýlaus réttur þolandans að kæra slíkan verknað og að réttvísin fái að hafa sinn framgang. Í dag hika ég ekki við að hvetja þolendur til að leggja fram kæru í kynferðisbrotamálum og leita þeirrar aðstoðar fagaðila sem nú er í boði. Við verðum öll að draga lærdóm af þessu máli. Mistök sem þessi mega ekki endurtaka sig.

Húsavík 10. apríl 2013,

Sighvatur Karlsson