Fölsuð könnun

Hans Kristján Árnason, einn stofnenda Stöðvar 2, upplýsir á Facebookvegg sínum að frjálslega hafi verið farið með niðurstöður skoðanakannana og þær hafi beinlínis verið falsaðar. Hann greinir frá fundi sínum og Jóns Óttars Ragnarssonar með ónefndum forstjóra fyrirtækis sem kannaði áhorf. Staðan var verri en þeir félagar áttu von á en það reyndist ekki vandamál; forstjórinn einfaldlega breytti niðurstöðunum svo viðskiptavinum hans líkaði betur.

Hans Kristján tengir frásögn sína við blogg Ómars Ragnarssonar sem segir að allt spilist nú upp í hendurnar á formanni Framsóknarflokksins, dæmalaust ástand hafi skapast í íslenskum stjórnmálum, ef marka megi könnun MMR: "Helmingur sjónrmálaafls, sem hefur verið langstærsti flokkurinn í 90 ár, eða 15% allra kjósenda, ætla að rústa fylgi síns flokks og lyfta öðrum flokki í staðinn upp í hans sess, -- vill frekar kjósa öflugan formann þess flokks en veika formann síns flokks!"

Frásögn Hans Kristjáns:

Þegar við Jón Óttar Ragnarsson rákum Stöð 2 báðum við þekkt skoðanaskoðunarfyrirtæki um að kanna áhorf á stöðina. Eigandi og forstjóri þess mætti síðar til okkar með niðurstöðurnar. Við vorum þarna þrír á læstri skrifstofunni og við Jón biðum spenntir eftir niðurstöðunni. Forstjóri og eigandi könnunarinnar birti okkur tölurnar. Ekki áttum við Jón Óttar von á svona lélegri útkomu. Þá sagði verktakinn: Líkar ykkur ekki við þessar niðurstöður? ...Ó, NEI... reyndar ekki, við héldum að staðan væri skárri. Ekki málið, svaraði verktakinn ... ég barasta laga tölurnar. Svo krotaði hann eitthvað og sagði - Sko, líkar ykkur þetta betur? Ný og betri útkoma. Okkur Jóni leið strax betur.... og þó. Jamm, takk fyrir, sagði verktakinn - og rétti okkur reikninginn um leið og hann kvaddi, brosandi.

Uppfært 08:30:

Jón Óttar Ragnarsson brást skjótt við þessari frétt með pistli á pressan.is og upplýsir að maðurinn sem Hans Kristján talar um sé öndvegismaðurinn, "sem ekki mátti vamm sitt vita", Dr. Bragi Jósepsson, sem rak fyrirtækið Skáís. Hann vísar frásögninni á bug: "Ekki aðeins er enginn flugufótur fyrir fréttinni heldur er erfitt að sjá hverjum hún gagnast í þeirri pólistísku móðursýki sem nú gengur yfir landið."



Pistil Jóns Óttars má finna á hér.