Beckham: Áttum jafnteflið skilið

David Beckham var í byrjunarliði PSG í kvöld gegn Barcelona og stóð sig ágætlega. Hann fór svo af velli í síðari hálfleik. Leiknum lyktaði með jafntefli, 2-2.

"Við vissum alltaf að þeir myndu hafa boltann mikið í leiknum. Barcelona er ótrúlegt lið sem heldur boltanum einstaklega vel," sagði Beckham eftir leikinn.

"Við fengum samt frábær færi í fyrri hálfleik og ef við hefðum nýtt eitt þeirra hefði þessi leikur getað þróast á annan veg. Eftir að þeir skoruðu varð þetta erfitt en við áttum jafnteflið skilið.

"Ég nýt þess að fá að taka þátt í svona leikjum á ný. Þetta eru alltaf sérstök kvöld. Þetta verður ekkert betra í boltanum.

"2-2 er alltaf betra en 1-2. Við vitum að seinni leikurinn verður mjög erfiður en við höfum trú á því að við getum strítt þeim og náð úrslitunum sem við þurfum á að halda."