"Ég ætla ekki að hrapa að neinum ákvörðunum"

Innanríkisráðherra hefur ekki ákveðið hvort víkja eigi lögreglumanninum, sem Erla Bolladóttir hefur kært fyrir kynferðisbrot, úr starfi eða færa til. Þetta kom fram í kvöldfréttum Rúv.

Erla kærði einn rannsóknarlögreglumannanna sem kom að Guðmundur- og Geirfinnsmálinu fyrir nauðgun. Það gerði hún eftir að hafa rætt við starfshópinn sem skilaði skýrslu um málið á dögunum.

„Ég ætla ekki að hrapa að neinum ákvörðunum. Við förum vandlega yfir þessi mál, það munu menn eflaust gera hjá Embætti lögreglustjórans á höfuðborgarsvæðinu en fyrst og fremst er það ríkissaksóknari sem hefur málið með höndum," segir Ögmundur Jónasson innanríkisráðherra í samtali við Rúv.

Erla segir rannsóknarlögreglumanninn hafa komið ítrekað inn í klefa hennar til að yfirheyra hana. Í eitt skiptið hafi hann nauðgað henni.

„Það eru hæg heimatökin fyrir menn sem þekkja aðstæður, þá vita þeir hvernig rútínan er og geta hagað sér samkvæmt því," segir Erla.