„Best að hann fylgi því máli þá bara eftir“

Árni Sigfússon, bæjarstjóri í Reykjanesbæ, kannast ekki við að hafa brotið stjórnsýslu eins og Friðjón Einarsson, oddviti Samfylkingarinnar í Reykjanesbæ, sakar hann um.

Friðjón krefst afsagnar bæjarstjórans eða afsökunarbeiðni frá honum, og segir Árna hafa brotið stjórnsýslulög og samþykktir Reykjanesbæjar þegar hann ákvað að leggja ekki fyrir bæjarráð innsend drög að viljayfirlýsingu um uppbyggingu innviða í Helguvík og Reykjanesbæ frá Katrínu Júlíusdóttur, fjármála- og efnahagsráðherra, fyrir hönd Ríkistjórnar Íslands.

„Ef hann telur mig hafa brotið stjórnsýslu þá er bara best að hann fylgi því máli þá bara eftir," segir Árni, og bætir því við að hann hafi ítrekað gert grein fyrir því að bæjarstjórnin væri að kalla eftir frumvarpi „en ekki einhverjum drögum".

„Þessi svokölluðu drög að viljayfirlýsingu sneru að styrk til Reykjanesbæjar sem nemur hundrað milljónum. Slíkt er ekki svaravert, en við vorum líka að kalla eftir upplýsingum sem áttu að koma varðandi minnisblað ríkisstjórnarinnar. Það er sjálfsagt að að bæjarráðsmenn geti skoðað þetta í rólegheitunum ef þeir vilja, en ég held að það komi þessari ríkisstjórn ekkert við. Þetta sýnir fyrst og fremst málefnaþurrð Samfylkingarinnar í þessu máli. Það er til skammar hvernig að þessu hefur verið staðið og endar þá greinilega í þessari aðför."

Auk þess að krefjast afsagnar Árna sagði Friðjón þetta ekki vera í fyrsta sinn sem hann verði „uppvís að slælegum vinnubrögðum". Árni segist ekki vita til hvers Friðjón vísar þar.

„Það verða bara aðrir að skýra. Friðjón Einarsson er í minnihluta og kann vel að vera að honum líki ekki ýmislegt sem við erum að vinna. Ég sem oddviti meirihlutans og bæjarstjóri vinn bara í þágu bæjarfélagsins og legg mál fyrir eins og vera ber. Ef hann er ósáttur við að vita ekki eitthvað sem hann vill vita verður hann bara að eiga það við sig."