Fagna nýju Barnahúsi

UNICEF á Íslandi fagnar nýútkominni skýrslu samráðshóps stjórnvalda um aðgerðir gegn kynferðislegu ofbeldi. Í skýrslunni sem kynnt var í dag er lagt til að tæplega 300 milljónum verði varið til aðgerða gegn barnamisnotkun.

UNICEF hefur sent frá sér yfirlýsingu í tilefni nýútkominnar skýrslu. Þar er sérstaklega fagnað tillögum um kaup á nýju Barnahúsi. Er það trú samtakanna að aðgerðir þær sem kynntar voru í dag, og fjallað var um hér á Vísi, verði samfélaginu öllu til heilla.

Yfirlýsingin

UNICEF á Íslandi fagnar þeim skýra vilja til úrbóta sem birtist í skýrslu samráðshóps stjórnvalda um aðgerðir gegn kynferðislegu ofbeldi. Skýrslan var kynnt fyrir stundu. Tillögurnar í skýrslunni eru flestar kostnaðargreindar og hugsaðar til lengri tíma, sem er afar mikilvægt.

Í tillögum samráðshópsins er lögð áhersla á forvarnir, svo sem með eflingu og útvíkkun vitundarvakningar um kynferðislegt ofbeldi gagnvart börnum, gerð fræðsluefnis og stofnun rannsóknarsjóðs. Það er brýnt.

UNICEF á Íslandi fagnar að auki sérstaklega tillögum um kaup á nýju húsi fyrir Barnahús og fjölgun starfsmanna hússins, enda löngu ljóst að starfsemin var sprungin. Einnig er meðal annars í tillögum samráðshópsins að finna mikilvæga tillögu um að Barnahúsi verði gert kleift að taka á móti börnum sem orðið hafa fyrir annars konar ofbeldi en kynferðislegu ofbeldi.

Ein af forgangstillögum samráðshópsins er að starfsemi vitundarvakningar um kynferðislegt ofbeldi gagnvart börnum verði útvíkkuð og „fest í sessi til frambúðar í þeim anda sem UNICEF og fleiri aðilar hafa lagt til með tillögum sínum um svokallað Ofbeldisvarnarráð." Þetta er UNICEF á Íslandi fagnaðarefni, sem og að sérstakur verkefnisstjóri verði ráðinn þegar í stað í fullt starf til að gera tillögur að framtíðarfyrirkomulagi forvarna og fræðslu.

Ánægjulegt er að í skýrslu samráðshópsins er tekið tillit til ábendinga sérfræðihóps barna sem aðstoðaði UNICEF við gerð nýútkominnar skýrslu sinnar Réttindi barna á Íslandi: Ofbeldi og forvarnir. Eftir útkomu hennar hitti sérfræðihópurinn bæði ráðherra og samráðshópinn. Meðal tillaga ungmennanna var að gert yrði ráð fyrir stuðningi gagnvart aðstandendum brotaþola – nokkuð sem þeim þótti skorta. Það er UNICEF á Íslandi sérstakt gleðiefni að tillögu um slíkt er að finna í skýrslu samráðshópsins. Raunar er ánægjuefni að fjölmargar þeirra tillaga sem kynntar voru í dag eru í anda áðurnefndrar skýrslu UNICEF.

Það er trú UNICEF á Íslandi að þær aðgerðir sem kynntar voru í dag verði samfélaginu öllu til heilla.