Jóhanna og Jónína í opinbera heimsókn til Kína

Jóhanna Sigurðardóttir forsætisráðherra og eiginkona hennar, Jónína Leósdóttir, fara í þriggja daga opinbera heimsókn til Kína 15. apríl næstkomandi.

Í tilkynningu frá forsætisráðuneytinu segir að boði kínverska stjórnvalda hafi verið komið á framfræi af þáverandi forsætisráðherra Kína, Wen Jiabao, í opinberri heimsókn hans til Íslands fyrir ári síðan.

Jóhanna mun eiga fund með forsætisráðherra Kína, Li Keqiang og forseta Kína, Xi Jinping, en þeir tóku formlega við embættum í mars síðastliðnum. Ennfremur mun forsætisráðherra eiga fund með fyrrverandi forsætisráðherra, Wen Jiabao.

„Í tengslum við heimsókn forsætisráðherra verður undirritaður fríverslunarsamningur á milli Íslands og Kína, en unnið hefur verið að honum um sex ára skeið og sammæltust forsætisráðherrar Íslands og Kína um það í apríl 2012 að setja aukinn kraft í að ljúka þeim viðræðum þannig að hægt væri að undirrita hann innan árs.

Samningurinn verður undirritaður af utanríkisráðherra, ásamt utanríkisviðskiptaráðherra Kína.

Jafnframt verður haldið viðskiptaþing í Peking þann 16. apríl með þátttöku fulltrúa íslenskra og kínverskra fyrirtækja og stofnana, þar sem tækifæri í tengslum við fríverslunarsamning ríkjanna verða rædd," segir í tilkynningunni.