"Þetta er þakklætisvottur"

Íslenskir kvikmyndagerðarmenn fagna auknum framlögum í Kvikmyndasjóð Íslands með viðeigandi hætti. Landsmönnum verður boðið í bíó núna um helgina og gefst færi á að sjá helstu perlur íslenskrar kvikmyndasögu.

Verulega dró úr fjárframlögum í Kvikmyndasjóð í kjölfar hrunsins og um leið dróst framleiðsla kvikmynda saman. En nú birtir til, enda hefur sjóðurinn hækkað um helming. Af því tilefni vilja kvikmyndagerðarmennirnir þakka fyrir sig með því að blása til kvikmyndaveislu um allt land.

Alls verða þrjátíu og fjórar íslenskar kvikmyndir sýndar á átján stöðum og ókeypis verður inn á allar sýningar. Til dæmis verður Sódóma Reykjavík og Börn náttúrunnar sýndar í Bíó Paradís.

Þá verður Hrafninn flýgur sýnd Háskólabíói.

Hetjur Valhallar-Þór verður sýnd í Ólafsvík og það í félagsheimilinu Klifi.

Þá verður Borgríki sýnd á Patreksfirði og Algjör Sveppi og dularfulla hótelherbergið á Ísafirði.

Það verður síða nóg um að vera á Norðurlandi þar sem sýningar fara fram á sex stöðum. Þar á meðal verður Englar alheimsins sýnd á Hvammstanga, Bíódagar á Sauðárkróki og Á annan veg á Raufarhöfn. Og þá má einnig geta þess að sýningar verða á Ólafsfirði líka.

Þá verður Okkar eigin Osló sýnd á Egilsstöðum og Borgríki á Vopnafirði.

Sunnlendingum er einnig boðið í bíó. Hetjur Valhallar verður til sýninga á Höfn í Hornafirði og Gauragangur verður síðan sýnd á Kirkjubæjarklaustri.

„Þetta er svona þakklætisvottur. Íslenskir kvikmyndagerðarmenn eru þakka fyrir sig. Ríkisstjórni jók framlag í kvikmyndasjóð eftir nokkur mögur ár og við vildum sýna lit og bjóða fólki í bíó og hafa gaman," segir Ragnar Bragason, leikstjóri.

„Ég hvet alla til að mæta og þakka öllum þeim aðilum sem koma að þessu verkefni, sýningarmenn og aðrir, sem leggja fram vinnu sína. Ég vona að fólk skemmti sér vel og sjá vonandi gamla perlu þau hafa ekki séð í áratugi."