Skip og bátar streyma á miðin eftir bræluna

Skip og bátar tóku að streyma út á miðin undir morgun umhverfis allt landið, eftir marga bræludaga í síðustu viku.

Sumir fóru að róa strax um helgina og var afli góður, eins og oft er eftir brælur. Þannig greinir vefurinn aflafréttir.is frá því að netabáturinn Birta frá Sandgerði hafi komið að landi í gær með hátt í 20 tonna afla úr aðeins fjórum trossum, sem þykir afburða gott.

Þegar búið var að fylla lestina, var afli settur í nokkur kör á millidekki og eitt kar var híft upp á þak, eða efradekk, en báturinn er yfirbyggður.