Þór vill þjóðstjórn fram að kosningum

Þór Saari vill að ríkisstjórn, skipuð fulltrúum allra flokka á Alþingi, taki við núverandi ríkisstjórn og starfi fram að kosningum. Þór mælti fyrir vantrausttillögu á ríkisstjórnina á þingfundi sem hófst klukkan hálfellefu. Þór telur að með skipun þjóðstjórnar, fremur en að núverandi ríkisstjórn starfi sem starfsstjórn fram að kosningum, séu meiri líkur á að sátt náist um ýmis mál er varða þjóðarhag.

Ástæðan fyrir vantrauststillögunni er sú að Þór segir að frumvarpi um nýja stjórnarskrá, sem hafi verið samþykkt í þjóðaratkvæðagreiðslu, „hafi verið hent í ruslið," eins og hann orðar það. Hann segir það vera einsdæmi að þjóðaratkvæðagreiðslum sé hent í ruslið með þessum hætti.

Þór fór yfir feril stjórnarskrármálsins og gagnrýndi Hæstarétt fyrir að hafa ógilt kosninguna til stjórnlagaráðs. „Það er einsdæmi að Hæstiréttur ógildi kosningu þegar ekki er hægt að sýna fram á að vanhöld á kosningu hafi haft áhrif á útkomuna," segir Þór.