Vilja að varsla lítilla skammta af fíkniefnum verði refsilaus

Nokkrir þingmenn Hreyfingarinnar og stjórnarflokkanna vilja nýja stefnu í fíkniefnamálum þar sem horfið verði frá glæpavæðingu og unnið gegn fíkniefnaneyslu á forsendum heilbrigðis- og félagslega kerfisins. Þingmennirnir hafa lagt fram tillögu á Alþingi þessa efnis, en Birgitta Jónsdóttir er fyrsti flutningsmaður hennar.

Þingmennirnir segja að ef refsingar fyrir vörslu neysluskammta yrðu afnumdar væri ekki verið að lögleiða vörslu fíkniefna. Það yrði eftir sem áður ólöglegt en hins vegar refsilaust og til staðar verði sérstök nefnd eða teymi sem geti kveðið á um íþyngjandi ákvæði fyrir aðila sem verður uppvís að neyslu fíkniefna, sbr. næsta tölulið. Skilgreina þurfi hámarksmagn efna sem refsilaust megi hafa í fórum sínum en áfram verður heimilt að gera slík efni upptæk og veita aðila viðeigandi meðferðarúrræði.

„Þar sem farin hefur verið sú leið að leggja af refsingar fyrir vörslu neysluskammta fíkniefna, annaðhvort vægra fíkniefna eða allra líkt og í Portúgal, hefur neysla þeirra ekki aukist mikið heldur þvert á móti minnkað í langflestum flokkum. Ekki er því með rökum eða rannsóknum hægt að halda því fram að þessi leið auki neyslu fíkniefna," segir í greinargerðinni.

Meðflutningsmenn Birgittu að tillögunni eru Margrét Tryggvadóttir, Álfheiður Ingadóttir, Ólína Þorvarðardóttir, Jónína Rós Guðmundsdóttir, Skúli Helgason, Sigmundur Ernir Rúnarsson, Magnús Orri Schram og Þór Saari.

Hér má lesa meira um tillöguna.