Meiðyrðamál Egils sagt ódómtækt

„Ég er með frávísunarkröfu í málinu og hún er byggð á ákveðnum málsástæðum sem fjalla um það hvernig málið er ódómtækt," segir Sigríður Rut Júlíusdóttir héraðsdómslögmaður og verjandi eins þeirra sem Egill Einarsson hefur stefnt fyrir meiðyrði.

Alls hefur Egill stefnt fjórum en fyrirtaka í tveimur málum fór fram í Héraðsdómi Reykjavíkur í dag. Var lögð fram krafa um frávísun í öðru málinu, en það snýr að ummælum sem birtust á mótmælasíðu á Facebook vegna viðtals sem tímaritið Monitor birti við Egil.

„Frávísunarkröfur eru gerðar með vísan í 80. grein lagameðferðar einkamála um hvernig stefna eigi að vera úr garði gerð. Ég tel að málatilbúnaður stefnanda í stefnunni sé ófullnægjandi og fullnægi ekki þessari lagagrein," segir Sigríður.

Málflutningur um frávísunartillöguna fer fram 21. maí.