Varað við svifryki í Reykjavík

Styrkur svifryks (PM10) verður líklega yfir heilsuverndarmörkum í Reykjavík í dag, mánudaginn 18. mars. Í dag er hægur vindur, götur þurrar og engar líkur á úrkomu. Hálftímagildi svifryks við mælistöðina á Grensásvegi var klukkan 10 í morgun 94,3 míkrógrömm á rúmmetra. Sólarhrings heilsuverndarmörkin eru 50 míkrógrömm á rúmmetra.

Næstu daga er búist við að þurrviðri og auknum vindi sem getur þyrlað upp ryki af þurri jörðu og valdið rykmengun.

Heilbrigðiseftirlit Reykjavíkur fylgist náið með loftgæðum borgarinnar og sendir frá sér viðvaranir og leiðbeiningar ef ástæða þykir til. Áhugasamir geta fylgst með styrk svifryks á vefmæli á heimasíðu Reykjavíkurborgar. Mælinn má finna vinstra megin á síðunni. Hann sýnir styrkinn á mælistöðinni við Grensásveg.

Uppspretta svifryks í dag er m.a. frá ösku frá svæðinu í kringum Grímsvötn sem barst til höfuðborgarsvæðisins í óveðrinu um daginn. Askan hefur enn ekki náð að skolast burt.