Neyðarlínan fékk 2700 símtöl og Landsbjörg fór í 120 útköll

Nóg var að gera hjá björgunarsveitarmönnum og starfsmönnum Neyðarlínunnar í gær þegar óveður gekk yfir landið. Á höfuðborgarsvæðinu var ófært og var fólki ráðlagt að fara ekki út úr húsi fyrri hluta dags. Björgunarsveitin Landsbjörg fékk um 120 aðstoðarbeiðnir og Neyðarlínan tók við 2700 símtölum.

Á venjulegum degi hjá Neyðarlínunni berast þangað um 700 símtöl að meðaltali. Í gær bárust 2700 símtöl, langflest vegna óveðursins. Á tímabilinu frá klukkan sjö um morguninn til klukkan tvö eftir hádegi, komu 1525 símtöl. „Svo hélt þetta áfram fram á kvöld. Við vorum vel mönnuð þegar við mættum á vaktina en þegar mest lét vorum við níu," segir Tómas Gíslason, aðstoðarframkvæmdastjóri Neyðarlínunnar.

Þegar óveðrið gekk yfir höfuðborgarsvæðið í byrjun nóvember síðastliðinn, fékk Neyðarlínan 3187 símtöl - sem er aðeins meira en í gær. Neyðarlínan miðar við tímabilið frá miðnætti til miðnættis.

Gunnar Stefánsson sviðsstjóri hjá Landsbjörg segir að bara á höfuðborgarsvæðinu hafi um 150 björgunarsveitarmenn verið að störfum í 38 hópum. Alls bárust um 120 útköll allan daginn í gær.

„Á bakvið eina aðstoðarbeiðni geta kannski verið þrjátíu bílar fastir," segir Gunnar og því ómögulegt að segja hversu mörgum björgunarsveitarmenn hjálpuðu. „Það er ekki oft sem við fáum svona svakalega hvelli eins og í gær - þetta er með því mesta sem við höfum lent í," segir hann.

Ekki er búið að taka tölur saman yfir allt landið en varlega áætlað má segja að um 200 björgunarsveitarmenn hafi verið að störfum um allt land í gær og sinnt á þriðja hundrað aðstoðarbeiðnum.