Fimm ára fékk lögreglufylgd í óveðrinu

Ragnheiður Lára Guðrúnardóttir er lögreglunni þakklát eftir gærdaginn, en „yndislegir lögreglumenn" komu henni og syni hennar til hjálpar í snjóþyngslunum.

„Ég var að keyra úr vinnunni minni í Mosfellsbæ í Grafarvog til að sækja strákinn minn á leikskólann, en þegar ég kom niður á Korpúlfsstaðaveg varð bíllinn pikkfastur," segir Ragnheiður, og bætir því við að velviljaðir menn hafi ýtt bílnum hennar upp á gangstétt.

„Ég fór að reyna að fá far áleiðis í Grafarvog þar sem klukkan var orðin hálf fjögur og ég vildi ekkert vera að leggja það á leikskólastarfsmanninn að sitja með hann mikið lengur. Það gat enginn leyft mér að sitja í þar til þessir yndislegu lögreglumenn keyrðu framhjá."

Lögreglumennirnir buðust til þess að skutla Ragnheiði á leikskólann en hún afþakkaði í fyrstu boð þeirra um að skutla mæðginunum heim. „Við búum niðri í Laugardal og það er svolítil vegalengd og færðin eins og hún var og þeir eflaust hlaðnir verkefnum. En þeir voru meira en tilbúnir til þess að keyra okkur heim."

Ragnheiður þáði því boðið og ætlaði að stökkva örsnöggt inn á leikskólann eftir syninum, Birgi Orra, en hann er fimm ára.

„Lögreglumennirnir ákváðu þá bara að fara með mér inn og drengurinn var frekar smeykur að sjá þegar lögreglumennirnir komu inn á deildina hans að spyrja eftir honum. En svo varð hann ánægður og fannst þetta mjög flott. Það voru náttúrulega allir krakkar úti í glugga að vinka og þetta vakti mikla lukku."

Björguðu vondum degi

Mæðginin fengu að því loknu far með lögreglunni niður í Laugardal, en stoppað var á leiðinni og bílum ýtt úr snjósköflum. Það fannst Birgi Orra gríðarlega spennandi.

„Hann hefur verið svolítið hræddur við lögregluna. Til dæmis ef hann er óþekkur hefur hann verið hræddur við að löggan komi og taki hann, þó ég hafi nú aldrei sagt þetta við hann. En þeir voru svo indælir á leiðinni, og spjölluðu heilmikið við hann. Og svo fékk hann límmiða í viðurkenningarskyni fyrir að hafa verið duglegur í bílnum."

Birgir Orri er því ekki lengur hræddur við lögregluna og var himinlifandi eftir ævintýrið. „Hann spurði mig hvort löggur væru góðar," segir Ragnheiður, en hún segir lögregluna svo sannarlega hafa bjargað vondum degi.