Frestar vantrauststillögu svo þingmenn geti gert ráðstafanir

Ásta Ragnheiður Jóhannesdóttir, forseti Alþingis, segir í tilkynningu sem hún sendi fjölmiðlum að meginsjónarmiðið fyrir því að vantrauststillaga Þórs Saari, þingmanns Hreyfingarinnar, hefði verið frestað fram á mánudaginn, væri það að allir þingmenn geti gert ráðstafanir til þess að vera við atkvæðagreiðsluna.

Þór lagði tillöguna fram í gær og óskaði fyrst eftir því að hún yrði tekin fyrir í dag en ekki reyndist meirihluti fyrir því. Að öllu jöfnu á að taka vantrauststillögu fyrir tveimur dögum eftir að hún er lögð fyrir.

Í tilkynningu frá Ástu Ragnheiði segir:

„Eftir að vantrauststillagan kom fram í gær, og með hliðsjón af óskum flutningsmanns, talaði ég við forustumenn flokkanna um tímasetningu umræðunnar um tillöguna og atkvæðagreiðslu um hana. Það var ekki vilji til þess að veita afbrigði fyrir því að hún kæmi á dagskrá í dag.

Eftir þessi samtöl eru það áform mín að tillagan komi á dagskrá á mánudaginn, 11. mars, þegar í upphafi fundar, kl. 10.30. Ég mun beita mér fyrir því að samkomulag verði milli þingflokka um fyrirkomulag umræðunnar þannig að atkvæðagreiðslan verði á fyrirfram ákveðnum tíma dagsins. Ég hef þá í huga þingmenn, fjölmiðla og þá sem vilja fylgjast með málinu og úrslitum þess.

Meginsjónarmiðið hjá mér er að allir þingmenn geti gert ráðstafanir til þess að vera við atkvæðagreiðsluna. Talsvert er um að þingmenn hafi bundið sig af ýmsum ástæðum, í dag og allra næstu sólarhringa, bæði hér á landi og erlendis.

Allir ættu hins vegar að geta gert ráðstafanir fyrir mánudaginn til að vera viðstaddir atkvæðagreiðsluna um vantrausttillöguna þann dag, þannig að vilji þingsins geti þá komið skýrt fram."