Flest brotin samræði í endaþarm eða leggöng

Flest þeirra barna sem leita til Barnahúss hafa orðið fyrir alvarlegustu gerð kynferðisofbeldis. Eftir því sem börnin eldast verða brotin alvarlegri en því yngri sem þau eru er líklegra að ofbeldismaðurinn sé tengdur brotaþola í gegnum fjölskyldu.

Í viðtölum við börn í Barnahúsi eru brot flokkuð í fimm alvarleikastig. Brot á alvarleikastigi eitt og tvö teljast væg en þá er til dæmis verið að tala um þukl á líkama barns utan klæða, brot á alvarleikastigi þrjú flokkast sem gróf eins og snerting á kynfærum barns og fróun.

Brot á alvarleikastigi fjögur og fimm teljast mjög gróf en flest brot á börnum sem komu í rannsóknarviðtöl til Barnahúss á árunum 2001 til 2012 teljast sem slík. 19% brota falla undir alvarleikastig fjögur sem er meðal annars tilraun til innþrengingar í kynfæri. 37% brota falla undir hæsta alvarleikastigið sem er fullt samræði við barn í leggöng eða endaþarm.

Ólöf Ásta Farestveit forstöðumaður Barnahúss segir að börnin sem verði fyrir alvarlegustu brotunum komi frekar í Barnahús.

Líklegast er að kynferðisbrot gegn barni eigi sér stað inni á heimili brotaþola, ofbeldismanns eða á sameiginlegu heimili. Eftir því sem barnið er yngra er líklegra að ofbeldismaðurinn sé tengdur brotaþola í gegnum fjölskyldu og eftir því sem börnin eldast verða brotin oftast alvarlegri. Þetta kemur fram í skýrslu Unicef um ofbeldi gegn börnum á Íslandi sem kom út í gær.

Frá janúar 2001 og til júní 2012 komu 1355 börn í rannsóknarviðtal í Barnahús, þar af 1169 stúlkur og 186 drengir. 154 þeirra voru aldrinum þriggja til sex ára og 279 á aldrinum sjö til ellefu ára. Langflest voru á aldrinum tólf til átján ára eða 922.