Harma ályktun VG um staðgöngumæðrun

Staðganga, stuðningsfélag um staðgöngumæðrun og Tilvera, samtök um ófrjósemi harma samþykkt ályktunar Vinstri Grænna gegn staðgöngumæðrun í velgjörð og telja að hún byggi á vanþekkingu og fordómum.

Í tilkynningu frá samtökunum segir að þau standi fast á því að konur eigi að hafa fullan umráðarétt yfir eigin líkama í þessu máli sem öðrum.

Þá árétta þau að staðgöngumæðrun sé bönnuð hér á landi. Misskilnings gæti í umræðunni og í ályktun Vinstri Grænna um að konum sé ekki bannað að ganga með barn fyrir systur eða vinkonu og gefa frá sér eftir fæðingu þess.

Staðganga og Tilvera segja það alrangt, Samkvæmt 5. gr. tæknifrjóvgunarlaga er staðgöngumæðrun alfarið bönnuð.