Fram og Hlynur Atli sættust

Heimasíða Fram hefur greint frá því að félagið hafi náð fullum sáttum við Hlyn Atla Magnússon, fyrrverandi leikmann Fram.

Hlynur Atli fékk sig lausan frá Fram eftir að Samninga- og félagaskiptanefnd KSÍ úrskurðaði deilu hans við félagið nú fyrr í vetur.

Í haust auglýsti Fram Hlyn Atla til sölu og þá sendi Hlynur Atli frá sér yfirlýsingu þess efnis að hann ætti ekki samleið með þjálfaranum Þorvaldi Örlygssyni.

En í sameiginlegri yfirlýsingur sem stjórn knattspyrnudeildar Fram og Hlynur Atli senda frá sér í dag kemur fram að aðilar séu sáttir við þessi málalok og skilji sáttir.

Hlynur Atli mun spila með Þór í Pepsi-deildinni næsta sumar.