Innlent

Siggi hakkari hitti FBI líka í Danmörku - Neitar að svara um fjárdráttinn

Siggi hakkari í Washington.
Siggi hakkari í Washington.
„Ætli þetta séu ekki 46 þúsund dollarar," segir Siggi tölvuhakkari um upphæðina sem hann á að hafa stolið af Wikileaks. Kristinn Hrafnsson, talsmaður Wikileaks, hefur kært Sigga, sem er 20 ára gamall, fyrir fjárdrátt eins og fréttastofa Stöðvar 2 greindi frá í kvöld. Vísir ræddi við Sigga, sem er staddur erlendis þessa dagana, þar sem hann var inntur eftir afstöðu til málsins en þá svaraði hann einfaldlega: „Nó komment."

Heimildir Vísis herma þó að hann líti á upphæðina sem ógreidd laun fyrir vinnu sína, sem Kristinn hefur hingað til talað um sem sjálfboðavinna. Þegar Siggi er spurður hvort hann hafi fengið peninginn neitar hann því ekki.

Siggi hefur áður komist í fréttirnar, síðast eftir að hann kom fram í viðtali við BBC þar sem hann hélt því fram að hann hefði hakkað sig inn á vef stjórnarráðsins þegar hann var tólf ára gamall. Þá sagði hann ennfremur að hann hefði verið starfsmannastjóri Wikileaks, nokkuð sem Kristinn sagði síðar að væri ósatt.

Siggi er með nokkrar kærur á bakinu. Meðal annars er honum gefið að sök að hafa skipulagt lífvarðanámskeið sem fólk skráði sig til þátttöku á og greiddi háar upphæðir fyrir. Námskeiðið var aldrei haldið. Sjálfur hafnar Siggi þessum ásökunum í samtali við Vísi.

„Hvernig getur verið að þetta hafi ekki verið haldið þegar það á að halda námskeiðið í júní?" spyr Siggi þegar hann er inntur eftir viðbrögðum vegna málsins. Hann segir að það standi til að halda námskeiðið.

Siggi segir um yfirheyrslur FBI að hann hafi sjálfviljugur rætt við fulltrúa alríkislögreglunnar hér á landi vegna málsins. Þá heldur hann því ennfremur fram í samtali við Vísi að hann fái greitt fyrir að vera uppljóstrari.

Heimildarmaður sem Vísir ræddi við fullyrðir að Siggi hafi fengið 4000 dollara greidda fyrir harða diska úr tölvum fyrir um ári síðan. Það er um hálf milljón á núverandi gengi. Þetta rímar við það sem Siggi segir og sýnir ennfremur að hann virðist vera uppljóstrari FBI frekar en að hann hafi haft réttarstöðu grunaðs manns.

Eins og kunnugt er synjaði innanríkisráðherrann, Ögmundur Jónasson, alríkisfulltrúunum um réttarbeiðni til þess að athafna sig hér á landi vegna meintrar tölvuárásar sem var yfirvofandi. Engu að síður athöfnuðu mennirnir sig hér á landi í fimm daga eftir að þeim var synjað um heimildina. Þeir ræddu svo við Sigga daglega þessa fimm daga á fimm mismunandi hótelum. Eftir að ráðuneytið kom þeim skilaboðum áleiðis til fulltrúanna að þeir væru ekki velkomnir hér á landi fór Siggi, þá nítján ára gamall, með þeim til Washington í Bandaríkjunum þar sem viðtölin héldu áfram. Síðar hitti hann þá einnig í Danmörku.

Spurningarnar alríkisfulltrúanna snéru helst að Julian Assange og Wikileaks. Svo virðist sem áherslan hafi ekki verið á rannsókn vegna yfirvofandi tölvuárás hér á landi.

Siggi segir að hann hafi ekki verið færður til yfirheyrslu vegna kæra varðandi fjárdrátt.


Tengdar fréttir

FBI tók piltinn með sér til Washington

Maðurinn sem FBI yfirheyrði var fluttur af landi brott eftir að innanríkisráðuneytið tjáði fulltrúum alríkislögreglunnar um að þeir væru ekki velkomnir hér á landi. Hann var svo yfirheyrður í fjóra daga til viðbótar í Washington samkvæmt heimildum Vísis.

Segja innanríkisráðuneytið hafa heimilað komu FBI til Íslands

Innanríkisráðuneytið var með í ráðum varðandi komu bandarísku alríkisfulltrúanna (FBI) hingað til lands í ágúst árið 2011 og réttarbeiðni frá fulltrúunum lá inni á borði innanríkisráðuneytisins í rúman mánuð áður en þeim var heimilað að koma hingað til lands.

Komu athugasemdum á framfæri vegna komu FBI til Íslands

"Þetta stenst,“ segir Ögmundur Jónasson innanríkisráðherra spurður um orð Kristins Hrafnssonar í Kastljósi í kvöld, þar sem hann lýsti því þegar fulltrúar bandarísku alríkislögreglunnar (FBI) komu hingað til lands til þess að rannsaka sakamál gegn WikiLeaks.

Segir Ögmund hafa rekið liðsmenn FBI úr landi

Kristinn Hrafnsson, upplýsingafulltrúi WikiLeaks, sagði í Kastljósi í kvöld að einkaflugvél með fulltrúum bandarísku alríkislögreglunnar (FBI), hefði lent á Reykjavíkurflugvelli og ætlað sér að hefja sakamálarannsókn gegn WikiLeaks hér á landi.

Kýrskýrt að FBI var hér í heimildarleysi

Össur Skarphéðinsson utanríkisráðherra fellst ekki á "varnir ríkislögreglustjóra og ríkissaksóknara“ í máli tengdu komu FBI hingað til landsins sumarið 2011. Þeir Ögmundur Jónasson hafi komið FBI úr landi til að vernda ungan íslenskan pilt.

Segir íslensk yfirvöld teymd eins og kjána í FBI-málinu

"Í fyrsta lagi er þarna staðfest að þessi lögreglusveit valsaði hér um í tæplega viku eftir að innanríkisráðherra hafði slitið þessum samskiptum,“ segir Kristinn Hrafnsson, talsmaður WikiLeaks en fram kom í yfirlýsingu í dag að FBI hefði komið hingað til lands í ágúst árið 2011 til þess að yfirheyra íslenskan ríkisborgara í bandaríska sendiráðinu.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.