„Mál þögguð niður og dómum hagrætt“

Birgir Guðjónsson, læknir og fyrrverandi formaður Lyfjaeftirlitsnefndar ÍSÍ, segir tímabært að grandskoða starf nefndarinnar og athuga hversu mörg mál hafa verið þögguð niður og hvort dómum hafi verið hagrætt.

Þetta kemur fram í greininni „Lance Armstrong og ÍSÍ" sem Birgir skrifar í Fréttablaðinu í dag, en í greininni segist Birgir hafa litla trú á lyfjaeftirliti sem „möglunarlaust hlýðir afskiptasamri forystu".

„Ég er að bera á þá mjög alvarlegar sakir sem ég hef gert áður. Ég ber á þá íhlutun með niðurstöðu prófa," segir Birgir í samtali við Vísi, og vísar þá til máls sem upp kom árið 2001 þegar jákvætt sýni fannst hjá einstaklingi úr félagi þáverandi forseta ÍSÍ. „Þarna var um að ræða skjólstæðing forsetans og það varð bókstaflega allt vitlaust."

Birgir bætir því við að skjólstæðingurinn hafi tengst forstjóra ónefnds fyrirtækis, og hafi lögfræðideild fyrirtækisins farið í málið af fullri hörku. Þessi íhlutun hafi verið brot á alþjóðareglum, og í grein Birgis í dag segir hann Íþrótta- og Ólympíunefnd Íslands verið í sömu hættu og Alþjóðahjólreiðasambandið er nú, vegna lyfjamisnotkunarmáls hjólreiðamannsins Lance Armstrong. Sambandinu hafi verið hótað brottvísun frá Ólympíuleikum vegna málsins.

„Ég gef það í skyn að þetta megi alveg leika aftur. Það sat fólk eftir sem var tilbúið að taka þessu," segir Birgir, en hann sagði af sér sem formaður Lyfjaeftirlitsnefndarinnar í kjölfar málsins. „Þegar það er gert einu sinni, og fólk sem sat eftir var tilbúið að þegja, þá er þetta spurningin hversu mörg tilfellin hafa verið."