Tjónið nemur hundruð þúsunda króna

Ljóst er að tjón vegna vegablæðinga nemur hundruð þúsunda króna. Vegagerðin hefur fengið tilkynningar um ónýtar vegklæðningar víða um land. Ökumenn eru hvattir til að hafa varann á en hreinsunarstarf mun halda áfram næstu daga.

Enn er ekki vitað fyrir víst hvað veldur þessum blæðingum á vegum. Grunur leikur á að samspil tíðarfarsins eigi hlut að máli. Undanfarið hefur verið frost og þýða til skiptis.

Samhliða því hefur Vegagerðin staðið í því að hálkuverja vegina en líklegt þykir að tjöru- og malarblæðinguna megi rekja til tilrauna Vegagerðarinnar með lífolíu. Fyrst fór að bera á blæðingunum snemma í morgun en ástandið hefur verið hvað verst á norðurleiðinni.

Mikil hætta getur skapast þegar ekið á vegum sem blæðir úr og á það jafnt við um fólksbíla og flutningabíla. Þá eru dæmi um að ökumenn hafi þurft að sveigja hjá stórum tjörustykkjum sem fallið hafa undan bílum. Gert er ráð fyrir að hreinsun á vegum muni halda áfram næstu daga.

„Það er mismikið eftir bílum en það eru tjón á þeim. Til dæmis hafa speglar brotnað, þetta er hörmung," segir Jóhann Hjálmarsson, bílstjóri hjá Farmflutningum ehf.

Fjölmargir hafa haft samband við Sjóvá í dag eftir að hafa orðið fyrir tjóni vegna blæðinganna. Heildarfjöldi tjónatilkynninga liggur ekki fyrir en ljóst er að tjónið er mikið.

„Þetta er mikið tjón, ég held að það sé hægt að áætla tvö til þrjú hundruð þúsund krónur á bíl til að byrja með," segir Magnús Svavarsson, framkvæmdastjóri Vörumiðlunnar.

En hvað er hægt að gera til að komast hjá þessu?

„Að fara varlega, sérstaklega þegar bílar mætast," segir G. Pétur Matthíasson, upplýsingafulltrúi Vegagerðarinnar.