Játaði að hafa ráðist á Riddara götunnar

Maðurinn sem handtekinn var í gær grunaður um að hafa ráðist á Guðjón Guðjónsson og stolið bíl hans hefur játað sök sína í málinu.

Ómar Smári Ármannsson, aðstoðaryfirlögregluþjónn hjá lögreglunni, staðfesti þetta í samtali við Vísi í dag.

Að sögn Ómars játaði maðurinn aðild sína að málinu og hefur verið sleppt. Ekkert liggi þó fyrir um tengsl ránsins og andláts Guðjóns fjórum dögum eftir árásina. Málið sé því ekki rannsakað sem manndrápsmál sem stendur.

Maðurinn stöðvaði Guðjón á Hverfisgötu í miðbæ Reykjavíkur laugardagskvöldið 12. janúar. Hann neyddi hann til að aka honum í Kópavog þar sem maðurinn réðst á hann, henti út úr bílnum og ók á brott. Þar fundu tvær konur Guðjón og hringdu á lögreglu.

Hinn 76 ára gamli Guðjón var mörgum þeirra sem sækja miðborgina á sumrin að góðu kunnur og var jafnan kallaður Riddari götunnar. Hann hafði vakið athygli fyrir það að hafa spilað úrvals harmonikkutónlist fyrir vegfarendur Laugavegs og Austurstrætis á góðviðrisdögum síðustu sumra.

Lögreglan mun senda frá sér fréttatilkynningu síðdegis varðandi málið.