Fjölgar í félagi íslenskra misfætlinga

Færst hefur í aukana að íslenskir misfætlingar taki sig saman, arki út í skóbúð og velji sér saman skó í tveimur stærðum.

Ólöf Hugrún Valdimarsdóttir, stofnandi félagsins sem heldur utan um starfsemi sína á Facebook, var í viðtali í Íslandi í bítið í morgun.

„Misfætlingar er hópur fólks sem er með misstóra fætur af guðs náð," segir Ólöf Hugrún en 49 hafa skráð sig í hópinn á Facebook þegar þetta er skrifað. Ólög Hugrún hafði skemmtilegar sögur að segja í morgunþættinum á Bylgjunni.

„Ég varð svo kjánalega glöð um daginn þegar ég sá póst á Misfætlingasíðunni. Þar lýstu tvær konur yfir ánægju sinni með það að hafa fundið hvor aðra. Þær eru búnar að fara og hittast," segir Ólöf Hugrún.

„Þetta var víst eins og að fara á blint stefnumót. Þær spjölluðu á Facebook, skiptust á símanúmerum og höfðu talað sig saman um að fara jafnvel saman í skóbúð," segir Ólöf Hugrún.

Skömmu síðar ákvað önnur konan að hringja í hina upp úr þurru, þar sem hún var í göngutúr á Rauðavatni.

„Hvað ertu að gera núna?" spurði konan og úr varð skóleitarferð í Kringluna. Konurnar, sem spegla hvor aðra þegar kemur að skóstærð, fundu skópar sem þær gátu sætt sig við. Önnur fór heim með skó fyrir hægri fót í stærð 39 og vinstri í stærð 37. Hinir skórnir tveir smellpössuðu á fætur hinnar konunnar.

Í umræðu á vef Misfætlingafélagsins á Facebook kemur fram að fólk með misstóra fætur geti tvívegis á ári sótt 12 þúsund króna bætur til Tryggingastofnunar vegna skókaupa. Upphæðin takmarkast þó við helminginn af verði annars skóparsins sem viðkomandi þarf að kaupa. Muna þarf tveimur skóstærðum á hægri fæti og þeim vinstri.

Hægt er að hlusta á viðtalið við Ólöfu Hugrúnu í spilaranum hér fyrir ofan. Hér geta misfætlingar gengið í félagið og fundið hinn eina sanna skófélaga.