78 ára skólabílstjóri fór í ökuhæfnispróf að eigin frumkvæði

Sæmundur Sigmundsson, skólabílstjóri á Vesturlandi, fór að eigin frumkvæði í ökuhæfnispróf í kjölfar gagnrýni við störf sín. Sæmundur stóðst prófið athugasemdalaust.

„Það hefur verið hart sótt að mér undanfarna mánuði og hefur gagnrýni á störf mín og meint starfshæfni við skólaakstur ekki einvörðungu skaðað mig persónulega heldur ekki síður rekstur fyrirtækisins," segir Sæmundur í viðtali á Vesturlandsvefnum Skessuhorni.

Sæmundur segist í viðtalinu afar ósáttur við ávirðingar starfsmanna Gunnskólans í Borgarnesi síðastliðið haust. Þá kom starfsfólk skólans skriflegri kvörtun um akstur Sæmundar á framfæri við sveitarstjórnar.

„ Ég vísa því alfarið á bug að ég sé óhæfur til að aka hópferðabílum og geng reyndar svo langt að kalla þetta einelti í minn garð," segir Sæmundur. Hann viðurkennir að hann sé þó mannlegur eins og aðrir.

„Mér hafa orðið á mistök, sem þó hafa aldrei leitt til stórslyss sem betur fer. Ég held hins vegar að enginn sé svo fullkominn að hann komist í gegnum lífið án þess að gera einhver mistök. Engu að síður fullvissa ég fólk um að daginn sem ég ekki verð lengur hæfur til að aka bíl, þá mun ég leggja inn ökuskírteinið og hætta akstri," segir Sæmundur sem hefur árlega farið í sjónmælingu frá því hann komst á áttræðisaldur. Þær hafa komið vel út og nú hefur hann fengið staðfestingu á ökuhæfni sinni í prófi hjá Frumherja.

„Það gerði ég í síðustu viku og var útskrifaður án athugasemda eftir rúmlega tveggja tíma akstur á 56 manna hópferðabíl um götur og stræti Reykjavíkur og Mosfellssveitar í dumbungsveðri," segir Sæmundur sem skilur ekki hvað fólki gangi til með ásökunum í sinn garð.

„Ég mat það því þannig að ég hefði í raun ekki nema um tvo kosti að ræða. Annars vegar að láta undan þrýstingi sumra í þessu samfélagi og hætta akstri, eða hins vegar að halda honum áfram. Fyrst um sinn ætla ég að velja síðari kostinn og þess vegna fór ég í þetta ökupróf hjá Frumherja, til að sýna fram á að hæfni mín til aksturs er þannig að fólk á ekki að þurfa að efast um hana," segir Sæmundur í viðtalinu á Vesturlandsvefnum Skessuhorni.

Viðtalið í heild sinni má sjá á Skessuhorni sem birtir einnig staðfestinguna sem Sæmundur fékk á ökuhæfni sinni.