Rannsókn líkamsárásarmáls komin 227 daga fram yfir viðmiðunartíma

Mikill málafjöldi og mannekla hjá embætti ríkissaksóknara hefur orðið til þess að rannsókn á alvarlegri líkamsárás á Hólum í Hjaltadal fyrir tæpu ári er ekki enn lokið. Þó liggur fyrir játning í málinu.

Freyja Þorvaldardóttir varð fyrir þeirri óskemmtilegu lífsreynslu að vera sleginn í andlitið með hurðarhúni á Hólum í Hjaltadal í mars á liðnu ári. Árásaraðilinn játaði strax sök sína en sjö tennur brotnuðu í munni Freyju sem er búin að missa töluna á þeim aðgerðum sem hún hefur þurft að gangast undir.

Freyja sagði í samtali við Vísi í vikunni að leiðinlegt væri fyrir þá, sem verði fyrir árásum á borð við þessa, að þurfa að bíða svo lengi eftir að mál þeirra sé tekið fyrir.

„Það er stórt skref í bataferlinu að klára þetta fyrir utan allt annað sem maður er að vinna í. Þetta er bara sorglegt," sagði Freyja í samtali við Vísi.

Fulltrúi rannsóknarlögreglunnar á Akureyri staðfesti við Vísi að málið hefði verið sent embætti Ríkissaksóknara fyrir nokkrum tíma síðan. Í svari Kolbrúnar Benediktsdóttur, saksóknara hjá embætti ríkissaksóknara við fyrirspurn Vísis, segir að ekki sé hægt að gefa upplýsingar um einstök mál.

Í svarinu segir þó að öll líkamsrásármál eigi að vera í forgangi og er vísað í fyrirmæli ríkissaksóknara um viðmiðunartíma í því samhengi. Þar kemur fram að í nauðgunarmálum sé miðað við að meðferðartími sé ekki lengri en 60 dagar og 90 dagar í tilfelli líkamsárásarmála. Sá fyrirvari er þó gerður að rannsóknarhagsmunir og sérstakar ástæður geti lengt meðferðartímann.

Í máli Freyju liggur þó játning fyrir og fátt sem bendir til þess að lengja hafi þurft meðferðartíma málsins. Í svari ríkissaksóknara segir að mikill málafjöldi og mannekla hafi leitt til þess að embættið geti ekki haldið sér innan þessara viðmiðunarmarka í öllum málum.

Árásin átti sér stað þann 12. mars á síðasta ári. Síðan eru liðnir 317 dagar og málið því komið 227 daga fram yfir viðmiðunartíma ríkissaksóknara í líkamsárásarmálum.