Nauðsynlegt fyrir batann að rannsókn málsins klárist

Freyja Þorvaldardóttir, sem varð fyrir alvarlegri líkamsárás á Hólum í Hjaltadal í mars á síðasta ári, bíður enn eftir að ákæra verði gefin út í málinu.

Fjallað var um líkamsárásina á Vísi á sínum tíma þar sem meðal annars sjö tennur brotnuðu. Frétt Vísis má sjá hér. Þrátt fyrir að árásaraðilinn hafi strax játað brot sitt hefur ekki verið gefin út ákæra í málinu.

„Ég veit ekki hvað ég er búinn að fara í margar aðgerðir síðan þá. Búin að vera í meðferð hjá fagaðilum og allt svoleiðis," segir Freyja í samtali við Vísi. Hún segist upphaflega hafa vonast eftir því að ákæra í málinu yrði gefin út fyrir sumarfrí þar sem allir dómarar á Íslandi séu í fríi allan júlí- og ágústmánuð.

„Svo vonuðum við að þetta myndi klárast fyrir jól en það er bara ekkert að frétta," segir Freyja en lögfræðingur hennar hefur verið í sambandi við rannsóknarlögregluna á Akureyri sem hefur málið í sinni umsjá.

„Ég sendi henni (innsk: lögfræðingnum) tölvupóst öðru hverju. Það síðasta sem ég heyrði var að vonandi yrði gefin út ákæra í janúarmánuði en nú er janúar að verða búinn," segir Freyja. Henni finnst fyrir neðan allar hellur hve lengi þolendur ofbeldis þurfi að bíða áður en mál þeirrs séu tekin fyrir.

„Það er leiðinlegt fyrir þá sem verða fyrir svona hlutum að þurfa að bíða svona lengi. Það er stórt skref í bataferlinu að klára þetta fyrir utan allt annað sem maður er að vinna í. Þetta er bara sorglegt," segir Freyja.

Uppfærtkl. 11.10

Rannsóknarlögreglan á Akureyri staðfesti við fréttastofu að málið hefði verið sent Ríkissaksóknara fyrir þó nokkru síðan. Nánari upplýsingar vildi lögreglan ekki gefa. Ríkissaksóknari vildi ekki svara fyrirspurn fréttstofu símleiðis en bauð upp á að svara erindinu á tölvupóstsformi. Sú fyrirspurn hefur verið send.