Lahm: Guardiola er einn besti þjálfari heims

Philipp Lahm, fyrirliði Bayern München, bíður spenntur eftir komu spænska þjálfarans, Pep Guardiola, til félagsins. Hann tekur við liðinu næsta sumar.

"Pep Guardiola hefur verið einn besti þjálfari heims síðustu fjögur eða fimm ár. Félagið hreinlega titrar af spenningi yfir því að fá hann hingað," sagði Lahm.

"Þetta eru frábær viðskipti hjá félaginu. Það ber að hrósa yfirmönnum félagsins fyrir að hafa landað þessum þjálfara. Það er alltaf erfitt að næla í svona stóra bita.

"Þetta sýnir líka hversu góð ímynd er af okkar félagi, hversu mikil gæði eru í liðinu og hvað núverandi þjálfari hefur afrekað."